Usona Esperantisto № 2020:5 (sep-oct)

La estraro fariĝas “nesinkrona”

Hoss estas Direktoro de E-USA. Oni povas kontakti lin ĉe hoss ĉe lodestone punkto org.

[figure]

Al la estraro ne mankas entuziasmo kaj talento, sed malofte ni sukcesas realigi niajn ideojn. Planoj estas proponitaj, sekvas entuziasmaj pridiskutoj … kaj finfine, tro ofte, okazas nenio. Tempo pasas, la estraro distriĝas, kaj la planoj finfine forvaporiĝas.

Ekzemple: en antaŭa raporto mi proponis forigi pasvort-protekton de la estraraj protokoloj por fari nian organizon pli malkaŝa. La propono tuj aldoniĝis al nia oficiala agendo, kelkaj membroj esprimis entuziasmon en nia diskutforumo, kaj neniuj kontraŭis. Sukceso, ĉu ne? Bedaŭrinde ne. Pasis jam pli ol du monatoj, sed nenio ŝanĝiĝis.

La problemo grandparte estas burokrata: ni havas nur po unu unuhoran kunsidon monate por niaj oficialaj diskutoj. La estraro konsistas el volontuloj loĝantaj dise tra pluraj horzonoj, do ne estas surprize, ke preskaŭ duono el ili ne povas partopreni je la ĝusta horo. Tial foje mankas “kvorumo” – la minimuma nombro da ĉeestantoj por validaj voĉdonoj. Kaj eĉ kiam ekzistas kvorumo, foje mankas tempo en tiu sola horo por trakti eĉ la malnovajn erojn el la pasintfoja agendo. Membroj de la estraro maltrafas gravajn diskutojn, proponoj velkas, kaj planoj mortas.

Feliĉe, aferoj ŝanĝiĝas. Ekde nia lasta kunsido, ni adoptis rezolucion por “nesinkronaj” kunsidoj per sekura, tekstmesaĝa forumo. La estraro jam delonge uzas tiajn forumojn por neoficialaj diskutoj – sed estante neoficialaj, la diskutoj malofte transformiĝis en agadon. Ekde nun, tamen, estraranoj rajtas fari novajn proponojn, subteni proponojn de aliaj, kaj voĉdoni iam ajn, je tempoj por ili oportunaj. Ne plu ekzistos kialo por resti ekster la diskutado, aŭ por lasi proponojn velki dum monatoj.

Jen ŝanĝo eta, kaj longe posttempa. Tamen ĝi estas progreso. Kaj espereble ĝi kondukos nin al eĉ pli granda progreso estontece.