Esperanto-USA

Ĉi-vendrede, la literatura klubo de la ret-gimnazio
kie mi laboras kiel matematika instruisto okazigos deklamadon de poemoj. Ĉiu studento kaj ĉiu instruisto estas invitata deklami iun ajn poemon, ĉu originalan, ĉu verkitan de aliulo.

La poemoj ne devas esti en la angla -- fakte, tiuj, kiuj nun studas, aŭ jam majstris iun lingvon, estas kuraĝigitaj legi alilingve.

Verŝajne, mi legos anglan poemon -- estas multaj bonaj elektindaj! Mi povus eĉ legi iun poemon el miaj propraj, sed tiuj, kiuj estas bonaj ne estas seriozaj, kaj la miaj seriozaj ne estas bonaj. Mi ankaŭ povus stumbli tra iu poemo en alia lingvo. Sed min allogas legi esperantan poemon. Sed kion?

Mi serĉas poemon, kiu logus ne-esperantistajn adoleskulojn.

Ĉi-situacie, mi preferus poemon ne tro longan (tamen, certe ne tro mallongan), spritan, maksimume nur iomete samidiosinkrazian. Mi havas kelkajn ideojn -- el giŝpling, el auld, ktp.

Kiun poemon elektus vi ?